مردان (نامہ نگار)
مشیر اطلاعات خیبر پختونخوا بیرسٹر ڈاکٹر محمد علی سیف نے کہا ہے کہ وکالت نہ صرف ایک معزز اور مقدس پیشہ ہے بلکہ یہ معاشرے میں انصاف کی فراہمی اور قانون کی بالادستی کے لیے ریڑھ کی ہڈی کی حیثیت رکھتا ہے۔ نوجوان وکلاء اگر خدمت کے جذبے اور پیشہ ورانہ دیانتداری کو اپنا شعار بنائیں تو کامیابی ان کا مقدر بنے گی۔
وہ مردان میں ڈسٹرکٹ بار ایسوسی ایشن کے نو منتخب عہدیداروں کی حلف برداری کی تقریب سے بطور مہمانِ خصوصی خطاب کر رہے تھے۔ اس موقع پر خیبر پختونخوا بار کونسل کے نمائندے، وزیر اعلیٰ کے معاون خصوصی برائے فنی تعلیم طفیل انجم، سٹی مئیر مردان حمایت اللہ مایار، سینئر و جونیئر وکلاء سمیت بڑی تعداد میں افراد شریک تھے۔
تقریب سے ڈسٹرکٹ بار کے نو منتخب صدر آصف اقبال ایڈوکیٹ، جنرل سیکرٹری ذوالفقار علی ایڈوکیٹ اور دیگر مقررین نے بھی خطاب کیا اور وکلاء برادری کو درپیش مسائل اور ان کے ممکنہ حل پر روشنی ڈالی۔
بیرسٹر سیف نے نو منتخب عہدیداروں کو مبارکباد دیتے ہوئے کہا کہ صوبائی حکومت وکلاء کے مسائل سے مکمل طور پر آگاہ ہے اور ان کے دیرینہ مطالبات کو پورا کرنے کے لیے عملی اقدامات کیے جا رہے ہیں۔ انہوں نے بتایا کہ مردان بار سے متعلق مسائل پر وزیر اعلیٰ علی امین گنڈاپور اور صوبائی وزیر قانون سے مشاورت مکمل کر لی گئی ہے، جس کے بعد جلد پیش رفت متوقع ہے۔
انہوں نے کہا کہ مردان جوڈیشل کمپلیکس کی تعمیر، نوجوان وکلاء کے لیے شیڈز کی فراہمی، بار رومز کی سولرائزیشن، اور مالی گرانٹس سمیت دیگر مطالبات حکومت کی ترجیحات میں شامل ہیں۔
سپاسنامہ میں پیش کیے گئے مطالبات کا مثبت جواب دیتے ہوئے مشیر اطلاعات نے کہا کہ نوجوان وکلاء کی پیشہ ورانہ تربیت اور ہنر مندی (اسکل ڈویلپمنٹ) کے لیے بار کونسلز کو سنجیدہ منصوبہ بندی کرنی چاہیے تاکہ وکلاء کو معاشی ریلیف ملے اور وہ اپنی پیشہ ورانہ ذمہ داریاں بہتر انداز میں نبھا سکیں۔
انہوں نے مردان بار کی جانب سے آئین و قانون کی بالادستی، جمہوریت کے استحکام اور فوری و سستے انصاف کی فراہمی کے لیے جاری کوششوں کو سراہا اور وکلاء کے کردار کو خراج تحسین پیش کیا۔
اسی روز بیرسٹر ڈاکٹر سیف نے تحصیل رستم میں پریس کلب کے نو منتخب عہدیداروں کی حلف برداری کی تقریب میں بھی شرکت کی، جہاں انہوں نے عہدیداروں سے حلف لیا۔ اس موقع پر معاون خصوصی طفیل انجم، ڈی جی انفارمیشن انصاراللہ خلجی، اسسٹنٹ کمشنر رستم نعمان پرویز، مقامی معززین اور صحافیوں کی بڑی تعداد موجود تھی۔
تقریب سے خطاب کرتے ہوئے بیرسٹر سیف نے صحافیوں کو درپیش مسائل کے حل کے لیے حکومت کی جانب سے جاری اقدامات پر روشنی ڈالی اور رستم کے صحافیوں کو درپیش مسائل جلد حل کرنے کی یقین دہانی کرائی۔
