کاٹلنگ : فریقین کے درمیان فائرنگ ،2افراد جاں بحق ،خاتون سمیت3زخمی

کاٹلنگ بازار میں دیرینہ دشمنی پر فریقین کے درمیان فائرنگ سے 2افراد جاں بحق جبکہ راہ گیر خاتون سمیت 3افراد زخمی ہو گئے ۔
ابتدائی اطلاعات کے مطابق واقعہ کاٹلنگ بازار میں پیش آیا جہاں سابقہ دشمنی کی بناء پر فائرنگ کے نتیجے میں بازار میدان جنگ بن گیا ۔
فائرنگ کی زد میں آکر 2افراد جاں بحق جبکہ خاتون سمیت 3افراد زخمی ہو گئے ۔
جاں بحق ہونے والوں میں دونوں فریقین سے ایک ایک شخص شامل ہیں جن کی شناخت نواب گل اور صابر خان کے ناموں سے ہوئی ۔
زخمیوں کو فوری طورپر ایم ایم سی مردان منتقل کردیا گیا ۔
فائرنگ کے بعد بازار میں حالات کشیدہ ہونے کے باعث پولیس کی بھاری نفری تعینات کردی گئی۔