رپورٹ: نصرت اللہ طاہر زی
ننگرہار، افغانستان
تین ماہ کے دوران پاکستان سے افغانستان کے لیے طورخم سرحد کے راستے واپس آنے والے افغان خاندانوں کی تعداد 12,500 سے تجاوز کر گئی ہے، جن میں تقریباً 88,000 افراد شامل ہیں۔
ننگرہار کے حکومتی حکام کے مطابق ان مہاجر خاندانوں میں سے متعدد کو اسلامی امارت اور امدادی اداروں کی جانب سے اب تک 112 ملین افغانی کی نقد امداد فراہم کی جا چکی ہے۔
تاہم حالیہ واپس آنے والے خاندانوں نے حکومت سے مستقل روزگار اور رہائش کی سہولت کا مطالبہ کیا ہے۔
زندگی بھر کی جمع پونجی پاکستان میں رہ گئی
47 سالہ محمدالدین، جو ضلع کوز کونڑ کا رہائشی ہے، تیس برس بعد واپس وطن لوٹا ہے۔ وہ کہتے ہیں کہ پنجاب، پاکستان میں محنت مزدوری کے ذریعے اپنا اور اپنے بچوں کا پیٹ پالتے تھے، مگر اچانک پولیس نے انہیں ملک چھوڑنے کا حکم دیا۔
"ہم اپنے گھر میں بیٹھے تھے، پولیس آئی اور کہا کہ فوراً اپنا ملک واپس جاؤ۔ ہم نے جلدی میں سامان باندھا اور اگلے دن طورخم کے راستے افغانستان آ گئے۔”
شمس الحق، ایک اور واپس آنے والے مہاجر نے بتایا کہ ان کی ساری جمع پونجی پاکستان میں رہ گئی ہے۔ "ہمارے پاس یہاں کچھ بھی نہیں، نہ کھانے کو ہے نہ رہنے کو۔ ہم حکومت سے مطالبہ کرتے ہیں کہ ہماری پاکستان میں چھوڑی گئی جائیدادیں یہاں منتقل کرانے کے لیے اقدامات کرے۔”
نہ گھر ہے، نہ کام
واپس آنے والے مہاجرین کا کہنا ہے کہ انہیں یہاں نہ کام کا کوئی موقع ملا ہے، نہ رہنے کے لیے جگہ۔
شیرزمان کا کہنا تھا کہ ہمارے پاس نہ گھر ہے، نہ زمین، نہ کوئی ذریعہ معاش۔ ہم حکومت اور اداروں سے اپیل کرتے ہیں کہ روزگار اور رہائش کے مواقع فراہم کیے جائیں۔
حکومتی موقف
ننگرہار کے ریفیوجی اور واپسی امور کے ڈائریکٹر، بازمحمد عبدالرحمن کے مطابق، جبری انخلا کی دوسری لہر کے آغاز سے اب تک 12,500 افغان خاندان طورخم کے ذریعے افغانستان واپس آ چکے ہیں۔
اس دوران 945 خاندانوں کو حراست میں لینے کے بعد پاکستان سے زبردستی ڈی پورٹ کیا گیا، جنہیں بھی نقد امداد دی گئی ہے۔
پاکستانی میڈیا کے مطابق، پاکستان حکومت نے ان 14 لاکھ افغان مہاجرین کو واپس بھیجنے کا فیصلہ کیا ہے جن کے پاس پی او آر کارڈز موجود ہیں اور جنہیں جون 2025 کے آخر تک کی مہلت دی گئی تھی۔
