رپورٹ (CBN247)
خیبرپختونخوا کے محکمہ ابتدائی و ثانوی تعلیم میں ایک سنسنی خیز واقعہ پیش آیا ہے۔ وزیرِاعلیٰ کے معاونِ خصوصی برائے ریلیف، بحالی و آبادکاری نائیک محمد مسلح افراد کے ہمراہ دفتر تعلیم میں گھس آئے اور تقریباً آدھے گھنٹے تک دفتر پر قبضہ جمائے رکھا۔
اس دوران انہوں نے سیکریٹری ایجوکیشن کو فون کر کے سنگین دھمکیاں دیں اور شمالی وزیرستان کی خاتون ڈسٹرکٹ ایجوکیشن آفیسر کے تبادلے کے احکامات منسوخ کرنے کا مطالبہ کیا۔ اس اچانک کارروائی سے دفتر کا ماحول مفلوج ہو گیا اور عملے کو شدید خوف و ہراس کا سامنا رہا۔
سیکریٹری ایجوکیشن محمد خالد نے واقعے کی تفصیلات اعلیٰ حکام کو ارسال کرتے ہوئے ایف آئی آر درج کرنے کی سفارش کی ہے۔ انہوں نے سرکاری دفاتر کے تحفظ اور ملازمین کی جانوں کے تحفظ کو مدنظر رکھتے ہوئے 15 ستمبر سے تمام افسران کو گھر سے کام کرنے کے احکامات جاری کر دیے ہیں۔
ساتھ ہی یہ بھی واضح کر دیا گیا ہے کہ آئندہ کسی بھی سرکاری یا نجی فرد کو مسلح افراد کے ہمراہ محکمہ تعلیم یا اس کے ماتحت دفاتر میں داخل ہونے کی اجازت نہیں ہوگی۔
یہ فیصلہ سرکاری دفاتر کے وقار اور عملے کی سلامتی کو یقینی بنانے کے لیے کیا گیا ہے۔
